ភ្នំពេញ៖ នាយករដ្ឋមន្ត្រីជប៉ុន លោក គីស៊ីដា ហ្វូមីអូ បានថ្លែងនូវការកោតសរសើរចំពោះស្មារតីកសាងសន្តិភាពរបស់ប្រជាជនកម្ពុជាដែលនាំអោយប្រទេសមានការអភិវឌ្ឍដូចបច្ចុប្បន្ន។
ថ្លែងនៅក្នុងសន្និសីទសារព័ត៌មានរួមគ្នាជាមួយនាយករដ្ឋមន្រ្តីកម្ពុជា សម្តេចតេជោ ហ៊ុន សែន នាល្ងាចថ្ងៃទី២០ ខែមីនា ឆ្នាំ២០២២នេះ លោក គីស៊ីដា ហ្វូមីអូ បានលើកឡើងអំពីការចូលរួមរបស់ជប៉ុនក្នុងសកម្មភាពថែរក្សាសន្តិភាពនៅកម្ពុជាកាលពី៣០ឆ្នាំមុន។ លោកបង្ហាញនូវមោទនភាពពីការរីកចំរើននូវសន្តិភាពរបស់កម្ពុជានិងការរួបរួមរបស់ប្រជាជនដែលធ្វើអោយកម្ពុជារក្សាបានសន្តិភាពដូចសព្វថ្ងៃ។
លោកថា៖ «គួររៀនពីស្មារតីសន្តិភាពរបស់កម្ពុជាដោយពិភពលោកពេលនេះកំពុងរស់នៅដោយស្ថានភាពដែលគួរព្រួយបារម្ភ»។
លោក គីស៊ីដា ហ្វូមីអូ ក៏ប្រកាសពីការផ្ដល់ការគាំទ្រជាបន្តបន្ទាប់នៅកម្ពុជាដើម្បីជំរុញសន្តិភាពដែលមានបច្ចុប្បន្ននេះឲ្យកាន់តែរីកចម្រើនកាន់តែខ្លាំងផងដែរ៕